Actualités

​ENSIDAN NAN KANPAY ELEKTORAL LAVALAS 16 SEPTANM 2016 MOVE IMAJ POU AYITI

Latriye ensidan ki rive nan kanpay elektoral lavalas jou 16 septanm 2016 la, sou direksyon anyen prezidan Jean Bertrand Aristide, se yon move imaj pou AYITI.  Mwen kwè li nesesè pou m fè komantè sa yo:

1.- Se responsablite gouvènman an, pou tout kandida, tout Pati Politik, tout patizan kandida, nan respè lalwa, jwenn garanti sekirite ak libète mennen kanpay yo san pwoblèm.
2.- Tout moun ki sensib pou imaj peyi a, tout patizan demokrasi dwe sonje, prensip kanpay elektoral se deba. Deba se ekzèsis pote lide, ranmase lide, jete lide nan trankilite ak tolerans.
3.- Labib di: pa rann mal pou mal. Pa itilize vye metòd pratik ansyen tan pou fè pase lide w.
4.- Veye tout jwèt mazèt, tout kòlè krapo oubyen mannèv pwovokasyon makyavelik pou echèk mobilizasyon fo majorite, pa transfome an vyolans fabrike, pou gate match la.
5.- Pa pran plezi sou maladi pesonn, malè pa gen klaksonn. Okontrè se mande pou n kontinye mande ministè sante piblik, pran responsablite l, pou lopital piblik yo gen kapasite pwoteje lavi tout moun.
6.- Laverite ak manti mache kòtakòt. Yonn se reve lòt. Men yo pa marasa. 16 septanm pa 16 desanm. Jodi a, laprès gen yon asosye ki rele rezo sosyo pou pwoteje l.  
7.- Mwen regrèt ak tout senserite m, pwoblèm sante dekonpozisyon, ki te rive ansyen prezidan Jean Bertrand Aristide Okap Ayisyen. Paske maladi pa defo.
8.- Mwen panse patizan ansyen prezidan Aristide yo, te mal jere imaj li, nan moman li te san konesans la, depi sou podyom nan, rive nan lopital la.
9.- Ensidan sa yo pa dwe repete, paske prezans lavalas ak prezidan Aristid nan eleksyon an, se yon bon bagay pou demokrasi nan peyi a. Paske malgre tou diferans nou oblije VIV ANSANM.

                                                                                                                         

    Evans PAUL KP

Afficher plus